بعيدا عن السياسة والاعيبها الجهنمية..شريف روما ومن منا مايعرف المثل المشهور (( شريف روما)) ..!

شريف روما
ومن منا لا يعرف المثل المشهور (( شريف روما )) ؟؟
هل هو شخصية عراقية او رومانية ؟؟؟
أتوقع أن أغلبيتنا يتوقع أن المثل عن شخصية من روما، هذا المثل أصله بغدادي وصدر بالثلاثينيات
قصة شريف روما !!
في الثلاثينيات من القرن الماضي ما كان ببغداد مسارح أو حركة مسرحية مثل اللي بمصر، وكان من أكبر رواد المسرح المصري آنذاك الفنان جورج أبيض .. اللي قرر أن يجيب فرقته ويجي لبغداد حتى يعرض مسرحيته الناجحة جداً في وقتها (يوليوس قيصر) طبعاً من إجه جاب وياه بس الممثلين الأساسيين وما جاب الكومبارس حتى يوفر نفقات السفر والتكاليف الأقامة .. الخ ،،،
وبما انه ماكو مسارح ببغداد، اختار أكبر گهوة بمنطقة الميدان وسواها مسرح .. بقت مشكلة منين يجيب كومبارس عراقيين .. محد يقبل يقوم بالدور .. جماعة نصحوه انه منطقة الميدان وهي مشهورة عند البغداديين، تعج بحثالة المجتمع من السكيرين والنشالة والحرامية والمطيرچية والشاذين وجميع فئات السرسرية. وهذولة ماعدهم عيب ولا شي .. إنطيه خمس فلوس يقوم لك بأي دور مسرحي .. وفعلاً جابهم ولبسهم دشاديش الرومان البيضة وخلى على روسهم أطواق الياس على أساس أطواق الغار .. ودربهم يوم العرض المسرحي مشت الأمور على مايرام والگهوة اللي سووها مسرح كانت مليانة بالجمهور .. إلى أن وصلت للمشهد إللي بيه ينادي حاجب الملك بأعلى صوته
والآن يتقدم أشراف روما للسلام على جلالة القيصر
الجمهور گاعد حباب يتفرج ع المسرحية إلى أن ظهر الأشراف .. وبدأ الهرج والضحك والعفاط وكل ما يخطر على البال
لك هذا منو؟ هذا عبود النشال … ههههههه
لأ لأ .. دشوف هذا ؟ رزوقي إبن شكرية الـحفافة !!! هلللللو يااااب .. وهذا عطا أخو حسنة ملص ،، لك شوفو هذا ابن حمدية العورة بواگ الحمام وكامو يصيحون ولك إنزل، ولك صايرلي شريف روما؟ هذه القصة ذكرتني الجماعه الي بالحكومه والبرلمان العراقي فعندما يخرجون من على الفضائيات يسميهم المقدم بدولة الرئيس وسعادة الوزير ومعالي الوزير وسيادة النائب وسماحة السيد وفضيلة الشيخ الجميع يضحك لأننا نعرف من هؤلاء الحثالة.. كلنا نعرف من اين جيئ بهم ففي كل دولة توجد منطقة الميدان !!…..
((منقول))